廣告

榴槤控嘅樂園 食即開馬拉榴槤、蔡瀾推介甜品

九月 21, 2018
19
Views

愛食榴槤嘅你注意喇!尖沙咀呢間新開嘅專門店一年四季都供應嚟自馬來西亞自置果園嘅榴槤,品種有貓山王、D24等;仲有唔同榴槤甜品,好似榴槤芝士撻同食家蔡瀾都推介嘅榴槤雪芭!以後隨時想食榴槤,就多個地方可以去啦。

 

榴槤樂園位於尖沙咀金巴利道,有兩層樓高。專門店喺馬來西亞彭亨州有自置嘅榴槤果園,全年供應唔同品種嘅原個榴槤!而常設品種包括港人最愛嘅貓山王、常見嘅D24,同帶少少獨特酒味嘅XO。暫定逢星期二、五空運到港,由於港人鍾意雪凍果肉嚟食,所以樹上熟後嘅榴槤會用-100℃氮氣保鮮,到店後慢慢解凍。

原粒貓山王榴槤($110/磅)

客人可以先喺地下選擇啱心水嘅榴槤,由專人開果,上二樓即時享用或者真空包裝後帶返屋企。凍凍地嘅榴槤果肉有啲似雪糕,特別係呢度嘅貓山王果肉都幾Creamy,味道香甜濃郁,帶少少苦味。而原來馬來西亞人唔會雪凍榴槤嚟食,而且認為有少少苦嘅榴槤有強身健體嘅功效呢。

榴槤Bingo(未定價)

除咗即開榴槤,呢度亦有唔少榴槤甜品選擇。而Bingo係食家蔡瀾起名嘅!原來因為呢間專門店其中一位合夥人同蔡瀾係朋友,蔡瀾食過後覺得呢個榴槤雪芭好食得有中獎Bingo嘅感覺,因而改名Bingo。

榴槤Bingo(未定價)

榴槤雪芭喺香港製造,雖然叫雪芭但因為榴槤果肉本身相當Creamy嘅關係,所以有啲似食緊好Rich嘅榴槤果蓉雪糕!榴槤香味濃郁,食落有一絲絲果肉口感,配埋春卷皮同粟米片增加口感層次,連朱古力牌都係榴槤釘形狀,榴槤控必試!

榴槤芝士撻($22)

另一重口味甜品!熱辣辣嘅榴槤芝士撻聞起嚟已經相當香,切開嘅時候仲有視覺效果滿分嘅流心效果。芝士撻飽滿足料,食落芝士香同榴槤香各半,撻皮亦香脆。

招牌榴槤芝士蛋糕($48)

相比起嚟呢件凍嘅榴槤芝士蛋糕香味就無咁霸道,味道方面榴槤香比芝士味濃郁,口感亦非常柔滑,不過略嫌餅底軟咗少少。榴槤芝士蛋糕同榴槤芝士撻都喺馬來西亞製作,為控制品質所以限量供應。
 

啖啖貓山王奶蓋($68)(果肉加$15)

專門店更同喺美國經營茶飲店嘅TVB藝人胡美貽(Nicole Wu)合作,唔單止將品牌茶飲帶到香港,仲加入榴槤果肉!好似呢杯就係近年大熱嘅奶蓋茶,Cream Cheese奶蓋特別加入榴槤果蓉,榴槤奶蓋上可以再加榴槤果肉,茶底係茉莉花茶。建議唔好用飲管搞勻,分開三層享用會更突出榴槤香。

頂級貓山王奶茶($58)

而呢杯就係將榴槤果肉加到奶茶當中,再加台式珍珠。飲落榴槤香味比啖啖貓山王奶蓋淡啲,可以推介畀第一次飲榴槤飲品嘅朋友仔。另外亦有焦糖布丁奶凍同黑糖仙草奶凍,兩款無榴槤成分嘅甜品畀唔食榴槤嘅同行朋友一試。

 

 

全店擺設設計都相當用心,唔單止有大量榴槤擺設,仲有多個打卡靚位,好似3D壁畫、榴槤坐墊等。唔單止多咗個地方可以安心大食榴槤,仲可以影相打卡,實在係榴槤控嘅樂園!

 

榴槤樂園
尖沙咀金巴利道92號

文、相:Cathy

廣告

Comments are closed.