廣告

4cm厚班戟+招牌刨冰抵港!京都人氣甜品銅鑼灣店直擊

九月 24, 2018
36
Views

有好消息畀各位甜魔們:呢間嚟自日本京都,喺東京同大阪都有分店嘅人氣日式甜品專門店,首間海外分店現已登陸銅鑼灣!必試招牌厚燒班戟 ,即叫就即製口感扎實。刨冰仲要係用原材料製冰,啖啖真材實料。

雪ノ下香港第一間分店位於銅鑼灣希雲街,而品牌本店就喺日本京都,主打日式厚燒班戟同刨冰,亦有供應鹹點,同手沖咖啡等飲品。

橘子蜂蜜班戟($68)

班戟有五款口味,全部選用廣島雞蛋同霧島牛奶製作,即點即製所以要等15至20分鐘。想試到最原始味道嘅話就可以選擇橘子蜂蜜口味。即係原味班戟配愛媛縣小池養蜂園嘅蜜柑蜂蜜,同宮崎縣高千穗發酵牛油。

 

厚燒班戟約4cm厚,食落同之前大熱嘅梳乎厘班戟口感完全唔同,裡面相當濕潤扎實,味道帶淡淡蛋香,而且啡色嗰層食落有少少脆口,淋上蜂蜜味道甜而不膩,係實在嘅幸福感。

抹茶班戟($78)

而抹茶控唔好錯過呢度嘅抹茶班戟,京都宇治抹茶口味嘅厚燒班戟灑上糖粉,以忌廉、北海道黑豆、京都黑豆同抹茶粉點綴,可以按自己喜好再倒上抹茶醬。

 

綿密嘅班戟食落甜度適中,唔會蓋過抹茶茶香同獨特嘅回甘。配埋煮至香甜軟綿嘅紅豆當然夾,值得一讃嘅係忌廉都係餐廳自家打發,食落有濃郁奶香,配抹茶班戟唔膩之餘仲增加柔滑口感。

日本生薑刨冰($68)

刨冰係品牌另一主打,採用日本低鈣同低鎂離子含量嘅天然軟水加原材料製作,好似呢個日本生薑刨冰就會先將高知縣黃金の里生薑糖水雪成冰,再用同日本店一樣嘅刨冰機將冰塊刨成碎冰!中間再加牛奶雪糕同生薑醬。

 

平時食到嘅刨冰大部分都以甜味為主,而呢款日本生薑味道帶少少辛辣,同刨冰嘅冰涼感對比起嚟相當有趣。加埋牛奶雪糕一齊食,好似食緊刨冰版嘅薑汁撞奶!冰粒係一貫日式刨冰嘅大細,碎而留有口感。

廣島雞蛋三文治($58)

除咗甜品,香港店亦有提供幾款鹹食,好似呢份三文治中間就夾咗使用廣島雞蛋嘅厚燒玉子同芥末籽,蛋控必食。

 

睇到呢度或者你會發覺品牌對食材好有要求,而香港店同樣所有食材都由日本進口。無論班戟定刨冰香港店之後都希望可以推出新款,包括計劃9月底登場,富本地特色嘅香港限定口味;同跟返日本當地,以唔同季節時令鮮果為主嘅期間限定口味!

而香港店嘅廚師都去過日本訓練半個月,直至佢地整過Menu上所有出品畀客人,日本亦有代表嚟香港幫助監控品質同訓練員工,保證大家食到嘅味道同日本一樣。

 

雪ノ下
銅鑼灣希雲街1-5號禮信大廈地舖
*試業期間營業時間為18:00-22:00,預計17/9正式開張

文、相、片:Cathy

廣告

Comments are closed.