廣告

七十年代的味道!女人街港式懷舊撚手小菜館

十月 14, 2018
28
Views

大牌檔不嬲都係港人至愛,貪佢多選擇又有氣氛,最啱同朋友食住小菜飲返杯!旺角女人街最近就開咗間樓上小菜館,無論裝潢定食物都好有七十年代港式風味。

老闆JOE本身喺香港同內地開火鍋店,因為想試下開新類型嘅餐廳,又見到依幾年懷舊主題風嘅餐廳盛行,就用三個月時間籌備,開咗依間女人街食飯公司。佢話餐廳入面嘅枱、櫈同地磚都係特登搵人訂造,希望營造到最真實嘅懷舊氣氛。

餐廳有唔少港式懷舊小食,如屋村三鮮($78),其實就係好多人都中意嘅街頭滷水,分別有生腸、墨魚同鴨腎,老闆話佢地有一位員工曾經喺一間知名街頭滷水串小食店做過,所以味道係一樣架。

麻辣韭菜花豬紅(68),唔會太辣,而且豬紅好滑,如果可以再入味少少就更好!

台式滷水鴨舌($68),滷水味啱啱好,唔會太鹹,餐廳選用新鮮鴨舌,所以鴨香味特別重。

想食鑊氣小炒必試鐵板尖椒醬爆大腸($108),每日去街市買新鮮大腸,新鮮大腸比起急凍會簿啲、香啲同埋無咁肥,加埋尖椒大火炒熟後放上鐵板,又香又惹味!

最難得係有砵仔雞蛋焗魚腸食,依味大叔焗魚腸($98)工序繁複,已經唔係周圍都有,雞蛋上跟足傳統加埋油炸鬼一齊焗,食落口外脆內軟。

另外仲有街頭小食一口臭豆腐($58),老闆向一間老字號臭豆腐生產商入貨,炸緊嘅時候全個廚房都聞到臭豆腐嘅香味,而且細細粒夠哂香脆!

老闆亦都特意發明咗一啲新菜式,希望可以迎合下年青人口味,好似泰式鹽焗乞衣魚($188),用鹽包起成條魚再拎去焗,食嘅時候再拎鎚仔扑開佢食。魚肉夠滑,帶有少少鹽香味但又唔會太鹹,配埋自製嘅泰式汁又幾開胃。

 

椒鹽粟米($68),大廚先將粟米炸過後加椒鹽,食落甜甜鹹鹹,好香口!

 

黑松露蝦多士($68),蝦滑夠彈牙,食落有陣陣黑松露嘅香氣。

 

最後要試下呢個蟹子蛋白脆米炒飯($98),炒飯粒粒分明,蟹子份量好多,多咗份口感同蟹子鮮甜嘅味道!

 

 

而且餐廳連午市都有好野食,有依家好HIT嘅滑蛋叉燒飯,蛋好滑,加埋豉油送飯一流。另外仲有豬扒煎蛋飯,豬扒好大件有成吋厚,食肉獸可以唸唸佢!

 

女人街食飯公司

地址: 旺角通菜街1A-1L威達商業大廈1樓B室

文、相:Yanica

廣告

Comments are closed.