廣告

天婦羅師傅徒手浸滾油 網友神級解拆

十月 17, 2018
75
Views

就當你好年輕唔知吳剛係邊個啦。

吳師傅係當年嘅爆肌男藝人,識功夫,

於是慈善show總會搵佢做啲高難度,

包括心口碎大石、食點著咗嘅炭、

同埋徒手喺滾油撈元寶!

嚇到見親阿媽炸嘢都驚。

 

點解要提起吳剛?因為呢期日本有條瘋傳片段,令我諗起佢。

 

條片攝於靜岡縣濱松市一間天婦羅餐廳,

個師傅整緊雞蛋天婦羅。

將隻流質雞蛋上粉漿拎去炸已經夠高難度,

師傅仲有一招,夠晒技驚四座。

就係徒手伸入油鑊,將隻蛋放入滾油入面!!

條片我睇咗幾次,佢隻手真係伸咗入去!!!

有網友估計師傅可能日子有功,雙手已經冇晒知覺嘞。

不過有另一位熟書嘅朋友,就用科學知識揭開謎團。

 

佢話可以用Leidenfrost effect(賴登福現象)解釋點解師傅雙手浸滾油都冇事。

呢個現象係指當液體接觸另一種更高溫物質,而溫度高於液體沸點,

就會有蒸氣包圍液體,成為隔熱層。

就好似當隻鑊燒到好紅,你倒少少水入去,水份唔會蒸走,

反而會形成露珠咁碌來碌去。

 

而天婦羅脆漿要夠冰凍先炸得靚,

所以師傅隻手蘸滿脆漿再放入滾油,水蒸氣就會形成保護層。

當然呢個係經驗之談,時間把握好緊要,

唔好喺屋企照辦煮碗!

其實我最關心個天婦羅好唔好食。

呢個「炸蛋」係天丼入面其中一樣主角,

成個飯仲有蝦、魚、紫菜、紫蘇夾酸梅等等天婦羅,

連埋味噌湯同前菜,先不過1000yen!

 

喂,仲未計人地炸埋隻手俾你睇兼呃like添呢!

原文傳送門,有片

廣告

Comments are closed.