廣告

勿與前度比較…情侶要知嘅禁忌

馮盈盈(FYY)向來大膽敢言,早前聖誕期間公然於節目上與醫生男友「寶寶」傾電話晒恩愛,不過講到兩人互送過咩聖誕禮物時,FYY就「女皇」上身,好霸氣咁話「有樣嘢我好堅持,就係唔會寫聖誕卡、心意卡同任何嘅卡畀佢!」

原來曾經有一年聖誕,寶寶彈FYY張聖誕卡寫得好敷衍,仲犯咗「情侶間嘅死罪」- 拎前度與現任比較!寶寶話:「你睇你張卡幾Hea!我以前個ex寫成篇文,幾有心思呀!」仲要拎張卡出嚟畀FYY睇,寶寶咁唔識做,又好難怪FYY嬲爆,發誓以後都唔再送卡畀男友!

兩個人相愛好一件好難得嘅事,要守護一段感情,就要遵守一啲禁忌,約束自己行為,「前度」係其中一個禁語,好似寶寶咁提起就唔會有好下場喇,以下仲有幾樣戒條都記得要遵守:


1.改變對方

好多人心底都有「夢中情人」呢個完美嘅形象,但現實同想像係兩回事,成日想改變對方,將對方變成你想要嘅模樣,但自己就唔願去改變,係好自私嘅行為。兩人相愛,多多少少都為對方而有些改變,順其自然就好。


2.疑神疑鬼

一段關係最忌諱就係彼此唔信任,好多矛盾起源就係懷疑對方,特別係女生,當對方遲放工、出去應酬,就神經質地覺得男人出去滾。對戀人多啲信心,會令對方有一種被尊重嘅感覺,拍拖都會拍得輕鬆、溫暖啲。


3.分手威脅

唔好成日將「分手」掛嘴邊,會顯得你唔重視呢段感情,對方亦會被你嘅「分手威脅」搞到心灰意冷,到時候想掹都冇得掹喇。


4.私人空間

熱戀時總會想成日痴住對方,但一日24小時痴實對方唔代表感情會變得更加好,所謂小別勝新婚,要適當地畀對方有個人空間,唔好令對方世界淨係得自己,唔係感情好快會淡。


5.斤斤計較

愛情唔係數學題,好難去秤邊個啲愛多啲少啲,成日計較住自己付出咗幾多,聽落都覺得攰,成世人流流長點樣計呀?

廣告
Instagram Feed
More Stories
10 個故事,10 種智慧